«Як спраўляюся з чаканнем? Ужо прызвычаіўся, калі шчыра». Дальнабойшчыкі расказалі, што адбываецца на мяжы
Паводле інфармацыі мясцовых жыхароў, доўгая чарга да беларуска-польскай мяжы ўтварылася сёлета яшчэ ў пачатку кастрычніка, таму кіроўцы грузавых аўтамабіляў спрабуюць разлічыць, колькі спатрэбіцца часу, каб перасячы прапускны пункт. Сайт Blizko.by даведаўся, што думаюць мясцовыя жыхары, кіроўцы і якія прычыны называе Дзяржпагранкамітэт.
Па словах Міхаіла, які ў пачатку кастрычніка вяртаўся ў Брэст па аўтатрасе М1/Е30, чарга з вялікагрузаў ужо тады пачыналася незвычайна далёка ад прапускнога пункта.
«Пры выездзе з вёскі Цюхінічы пачынаецца паласа разгону, — распавядае Міхаіл. — Гэта даволі далёка ад мытні, таму не чакаў, што яна будзе занятая фурамі. Але знізіўшы хуткасць, працягнуў рух у сваім кірунку».
З кожным метрам праезд Міхаіла ўсё мацней абцяжарваўся: грузавая тэхніка не стаяла ў адзін шэраг, а размясцілася на ўсёй паласе дарогі. Набліжаючыся да скрыжавання Казловічы-Клейнікі, ён спыніўся — дзве паласы былі занятыя, а праз 15 хвілін за яго машынай стала «хуткая» з уключанымі маячкамі сіняга колеру.
«Ды што гэта такое? Як тут рэгулюецца рух? Выклікайце каго-небудзь. Мне трэба хутчэй праехаць да хворага, пакуль ён не памёр», — эмацыйна ўсклікаў кіроўца «хуткай».
Па словах Міхаіла, і ззаду, і спераду аўтамабіля хуткай дапамогі стаялі як легкавыя машыны, так і вялікагрузы. На дапамогу прыехала ДАІ, пасля чаго стала вядомая прычына затору: беспаспяхова імкнучыся заняць лепшае месца на праезнай частцы, кіроўца-дальнабойшчык абмежаваў праезд астатнім удзельнікам руху.
Каментуючы сітуацыю ў пунктах пропуску на заходняй мяжы Беларусі, Дзяржпагранкамітэт называе наступную прычыну:
«Невыкананне кантрольнымі службамі сумежных краін ЕС нормаў пропуску спрыяе павелічэнню колькасці грузавога транспарту, які чакае ўезду на іх тэрыторыю».
За суткі колькасць фураў на ўезд у Польшчу павялічылася на 12%, у Латвію — на 5%. На літоўскім напрамку колькасць транспарту, які чакае, істотна не змянілася.
На інфармацыйным партале Дзяржпагранкамітэта сказана, што прапускная здольнасць пункта пропуску «Казловічы» складае 2000 грузавых транспартных сродкаў у суткі ў абодвух напрамках. Такую ж колькасць грузавога транспарту здольны прапускаць пункт «Кукурыкі», але ўжо змешанага тыпу.
Таксама паведамляецца, што працягласць памежнага пераходу ад пункта пропуску з беларускага боку да польскага складае два кіламетры.
Blizko.by спытаўся ў кіроўцаў-дальнабойшчыкаў, якія не першыя суткі стаяць у чарзе, у чым яны бачаць прычыну напружанай сітуацыі і з якой хуткасцю рухаюцца да беларускай мяжы.
Кайрат Нурмухамбетаў едзе па маршруце Казахстан — Бельгія, дастаўляе замарожаную рыбу. 9 снежня ён стаў у чаргу ў 22:00 і за няпоўныя шэсць сутак змог праехаць усяго тры кіламетры.
«Па прыблізных ацэнках, працягласць чаргі складае каля 20 кіламетраў. Так, маштабы здзіўляюць у тым ліку і мяне, — дзеліцца сваімі ўражаннямі кіроўца велікагруза. — Чуў, што канец недзе на мінскай трасе (аўтатраса М1. — заўв. рэд.). Не ведаю, хто тармозіць з праверкай: беларуская ці польская мяжа.
Адны кажуць, што беларусы не працуюць, іншыя кажуць, што палякі. Але па сваім досведзе магу сказаць, што беларускую мяжу ў сярэднім праходжу за 4-5 сутак, пасля чаго заязджаю на польскую тэрыторыю.
Але такая сітуацыя цяпер не толькі на гэтым пункце пропуску, а і амаль усюды. У «Каменным Лозе», напрыклад, стаяў 10 сутак».
У Кайрата таксама спыталіся, з якой мэтай на скрыжаванні Казловічы — Клейнікі стаіць чалавек з аўтаматам і машына ДАІ.
«Так, я сам чуў пра гэта. З аўтаматам стаіць АМАП. З якой мэтай? Без паняцця. Можа, былі бойкі».
Журналісты папрасілі таксама пракаментаваць сітуацыю з «хуткай», якую расказаў Міхаіл.
«Па-першае, мы едзем па вызначаным часе, па тахографе. Калі ў кіроўцы сканчаецца час, ён спыняецца на паласе. У такім выпадку ён не можа рухацца ні назад, ні наперад — гэта называецца парушэннем звышліміту. Па-другое, машыны стаяць і запаўняюць усю першую паласу, каб пасля даехаць да мяжы. З-за гэтага пачынаецца калапс, які прыводзіць да такіх непрыемных сітуацый.
Калі б беларускі бок вылучыў вялікую тэрыторыю, каб фуры не запаўнялі дзве паласы і адна за адной стаялі ў арганізаванай чарзе, такога б не было».
Па словах Кайрата, на гэтай жа глебе могуць узнікаць канфлікты:
«Асабіста я ў іх не ўступаў, але яны тут з'яўляюцца. З якой прычыны? Адзін кіроўца мог заснуць, а другі стаў на яго месца. З гэтага, як правіла, усё пачынаецца».
Іншы кіроўца-дальнабойшчык, якому, па асабістых падліках, засталося стаяць каля сутак, адзначае, што сітуацыя ўжо звыклая.
«Нічога страшнага не адбылося. Гэта ўжо нармальная з'ява, — распавядае Дзмітрый. — ДАІ стаіць амаль у самым пачатку чаргі — сочыць, каб фуры нікога не аб'язджалі.
Думаю, усё гэта павольнае прасоўванне звязана з тым, што на мяжы цяпер увялі ўзмоцнены кантроль праверкі.
Як я спраўляюся з чаканнем? Ужо прызвычаіўся, калі шчыра. Нядаўна, напрыклад, ехаў з Грузіі, дык там чарга з фур расцягнулася на 180 кіламетраў. Літаральна ад Тбілісі і да «Верхняга Ларса».
Чытайце таксама:
Для дальнабойшчыкаў на дарогах каля мяжы паставяць пункты абагрэву
«Цяпер платная чарга не меншая за звычайную». Перавозчыкі распавялі, як плацяць тысячы еўра за пропускі і суткамі стаяць на мяжы
«Менш чым за сотку з рэйса ў Польшчу ніхто не паедзе». Што перавозяць і колькі зарабляюць чаўнакі і кантрабандысты
Санкцыі для суддзяў, 30 мільёнаў еўра дапамогі, непрызнанне выбараў-2025 — расказваем пра вынікі Дзён Беларусі ў Брусэлі6
Каментары