Навукоўцы: Прыгажэйшыя студэнткі атрымліваюць у анлайн-рэжыме горшыя адзнакі, чым у аўдыторыях

Навукоўцам даўно вядома, што фізічна прывабныя людзі звычайна атрымліваюць большы заробак, чым іх менш яркія калегі. У такіх людзей больш шансаў атрымаць павышэнне на працы і меншая верагоднасць трапіць у турму. Цяпер навукоўцы, магчыма, здолеюць адказаць на пытанне, чаму так адбываецца, піша The Times.

Таксама прыгожыя людзі часцей атрымліваюць добрыя адзнакі ва ўніверсітэце, але чаму так адбываецца, дакладна невядома. Некаторыя эксперты лічаць, што гэта проста выпадкі дыскрымінацыі з боку выкладчыкаў на карысць больш прывабных студэнтаў. Іншыя ж мяркуюць, што прыгожыя людзі насамрэч лепш спраўляюцца з вучобай, бо звычайна яны больш упэўненыя ў сябе.

Адрын Мехік, даследчык з Лундскага ўніверсітэта ў Швецыі і аўтар новай працы, кажа, што пандэмія дала магчымасць зразумець, у чым жа карані такога эфекту. Ён звярнуўся да 307 студэнтаў-інжынераў, якія вучыліся ва ўніверсітэце і да пандэміі, і падчас яе. Журы з 37 чалавек ацаніла прыгажосць твару кожнага са студэнтаў па шкале ад 1 да 10 балаў, дзе 10 балаў азначала «выключна прыгожы».

Мехік прааналізаваў адзнакі студэнтаў па тых прадметах, дзе выкладчыкі самі вырашаюць, як яны ацэняць паспяховасць сваіх студэнтаў. На гэтых прадметах на адзнакі ўплываюць групавыя заданні, а таксама індывідуальная праца на семінарах і вусныя адказы.

Да пандэміі больш прывабныя студэнты абодвух палоў звычайна атрымлівалі лепшыя адзнакі. Гэтай перавагі не хапала для таго, каб вывесці на першае месца студэнтаў з дрэннай паспяховасцю, але статыстычна дадатковыя балы мелі значэнне.

Калі лекцыі перайшлі ў анлайн-фармат і скончылася вочнае навучанне, адзнакі ў студэнтак-прыгажунь пагоршыліся. Памер таго «бонусу за прыгажосць», які яны, здаецца, мелі да пандэміі, панізіўся на 80%.

Падаецца, што выкладчыкі дабаўлялі такім студэнткам балы, і калі пачаліся анлайн-заняткі, што значна знізіла час камунікацыі студэнтаў з выкладчыкамі, прыгажосць перастала адыгрываць сваю ролю. Падчас відэалекцый студэнтам прапаноўвалі ўключаць камеру, але гэта не было абавязковым патрабаваннем.

Мехік мяркуе, што на «бонус за прыгажосць» мог паўплываць і мужчынскі пол большасці выкладчыкаў, але жанчыны-прафесаркі таксама ставілі да пандэміі лепшыя адзнакі прыгажуням.

З прывабнымі хлопцамі ўсё атрымалася інакш: пасля таго, як лекцыі перайшлі ў інтэрнэт, іх адзнакі яшчэ больш павысіліся. Мехік тлумачыць гэта тым, што такія мужчыны могуць валодаць некаторымі якасцямі, што павышаюць прадуктыўнасць — напрыклад, больш высокай упэўненасцю ў сабе. Іншыя даследаванні паказваюць, што фізічна прывабныя мужчыны таксама больш настойлівыя і аказваюць большы ўплыў на сваіх аднагодкаў.

Мехік таксама разгледзеў прадметы, дзе адзнакі выстаўляліся ананімна і на падставе выніковых экзаменаў. Там ён не знайшоў сувязі паміж прыгажосцю і паспяховасцю студэнтаў.

«Прадмет для асуджэння і кпінаў». Як жывецца ў правінцыі людзям з яркай знешнасцю

«Ніхто не дае мне больш за 30 гадоў, але на гэта я трачу не менш за тысячу рублёў на месяц». Мінчанка — пра пластычную хірургію і рэакцыю мужчын

Былая тэлевядучая АНТ Люцыя Герашчанка стала трэнеркай па ёзе для твару

• 3
• 0
• 1
• 3
• 2
• 0
• 3
• 0