Грамадства11

«Яго ўжо чакалі — прыставілі пісталет да галавы і сказалі, што ён ужо прыйшоў». Пра гомельскага хлопца, які сядзіць за любоў да Украіны, расказвае сястра

24 лютага 18-гадовы Ілья Верамееў з Гомеля пачаў перапіску ў тэлеграме з сястрой Янай каля пятай раніцы. Прычына такой ранняй размовы — уварванне расійскіх войскаў ва Украіну і абстрэл улюбёнага ўкраінскага горада Мікалаеў, у якім жыла ягоная родная сястра. Ілья вельмі за яе хваляваўся і ўвесь час падчас перапіскі прасіў не падыходзіць да вокнаў. Праз тры дні хлопца затрымалі — пасля ягоных заклікаў у мясцовым чаце аказваць супраціў і пачаць дзейнічаць супраць вайны: на месцы збору з гамельчукамі яго чакалі сілавікі. Праз паўгода за гэта Ілью асудзілі да шасці з паловай гадоў калоніі. 22 лістапада будуць разглядаць апеляцыйную скаргу палітвязня, пасля чаго яго перавядуць у калонію. Сястра Ільі Верамеева Яна распавяла «Вясне» пра брата, ягонае затрыманне і тое, як можна цяпер дапамагчы яму.

Ілля Верамееў з сястрой Янай у Чарнігаве ў 2019 годзе

«Ілья марыў пераехаць ва Украіну»

Ілья толькі сёлета скончыў школу. 1 жніўня — ужо ў СІЗА — яму споўнілася 19 гадоў. Хлопец вырашыў не паступаць у навучальныя ўстановы, а пайсці працаваць. Неўзабаве ён знайшоў працу па вырабе дэкаратыўнай пліткі.

Сястра Ільі Яна жыве з сям'ёй ва Украіне ўжо некалькі гадоў. Апошні раз яна бачылася з братам год таму ў Гомелі.

«Наогул Ілья марыў пераехаць ва Украіну. Ён палюбіў Мікалаеў пасля таго, як прыязджаў да мяне ў госці. Ён нават у сацсетках у сябе нік ставіў «Ілья Мікалаеўскі». Яму, напэўна, больш за ўсё свабода спадабалася. Мікалаеў — прыязны і просты горад».

Ілля Верамееў у Мікалаеве ў 2017 годзе

Паводле Яны, брат вельмі востра ўспрыняў напад расійскіх войскаў на Украіну і, у прыватнасці, абстрэл з першых хвілінаў вайны ўлюбёнага горада Мікалаева, дзе жыла яго родная сястра:

«Мікалаеў рэальна вельмі жорстка абстрэльваўся. У першыя дні літаральна ў 300 метрах ад майго дома падарваліся танкі. Праз пару дзён — побач крылатая ракета».

Паведамленне Іллі да сястры зранку 24 лютага

«Ілья мае абвостранае пачуццё справядлівасці»

Падчас падзей 2020 года Ілья быў яшчэ ў 10-м класе. Сястра распавядае пра яго рэакцыю на масавыя пратэсты і жорсткае задушэнне іх уладамі:

«Ён вельмі хваравіта ўспрыняў гэта. Ілья такі хлопец — любіць свабоду. Ён жыў у мяне каля трох месяцаў у годзе 2018-м ці 2019-м ва Украіне. Яму вельмі падабалася. Ілля мае абвостранае пачуццё справядлівасці. Ён не разумеў, як такое магчыма [гаворка пра масавыя затрыманні, збіванні і катаванні пратэстоўцаў]».

Але пасля настойлівых просьбаў і ўгаворванняў мамы тады яшчэ дзесяцікласнік не ўдзельнічаў у акцыях пратэсту.

«Прыставілі пісталет да галавы і сказалі, што ён ужо прыйшоў»

Затрымалі Ілью ўвечары 27 лютага, каля 22-й гадзіны:

«Яго вельмі моцна абурыла гэтая ўся сітуацыя. Увечары ён сабраўся і пайшоў. І ў тым раёне, дзе ён дамаўляўся сустрэцца, яго ўжо чакалі — прыставілі пісталет да галавы і сказалі, каб не вырываўся, і што ён ужо прыйшоў».

На пытанне, як дзяўчына перажыла затрыманне брата, Яна адказвае: «Я дагэтуль не перажыла».

«Я гэта перажыву, калі толькі абдыму яго. Мама яго бачыць і чуе хоць часам на спатканнях, а ў мяне толькі нейкія лісты. І тое…»

«У яго быў такі стан тады — істэрыка і бездапаможнасць»

Ва Украіне цяпер 250-ы дзень вайны — пад вартай Ілья знаходзіцца 247 дзён. Амаль ад самага пачатку ён утрымліваецца ў гомельскім СІЗА. Паводле сястры, цяпер у ягонай камеры сядзяць людзі, якія вельмі моцна вераць прапагандзе. Да гэтага ў яго былі «адэкватныя суседзі».

«Вось цяпер сяджу з пяццю «зомбі». Звычайна хоць адзін заўсёды трапляўся мыслячы чалавек. Тут жа маса супярэчнасцяў, адсутнасць логікі, адмаўленне фактаў. Прычым працуе гэта ў адзін бок у іх. Самі распавядаюць відавочную лухту, не бачыўшы такога асабіста: «ну людзі ж ім распавядалі» (такія ж, як яны). Хоць факты пярэчаць іх словам, не тое што факты, нават логіка гуляе супраць відавочнай лухты. Што ім падабаецца, дакладней, «праграме», закладзенай у іх галовы, тое праўда. Што «праграме» іх не падабаецца, тое «не можа быць». Вось неяк так. Страшна гэта назіраць, калі шчыра. І самае галоўнае: іх не пераканаць! Гэта будзе марнаванне часу. Асабіста правяраў дзясяткі разоў. І нібыта сядзіш, тлумачыш, нібыта бачыш, што разумее, нават з чымсьці згаджаецца. Праз 10 хвілін падыдзеш да яго зноў з той жа тэмай, дзе ён, здаецца, разумеў і пагаджаўся, і зноў марнуеш 1,5-2 гадзіны часу і нерваў. І гэта кожны раз. Усё па коле, як «праграма» закладзена, так ён і будзе думаць, не, не думаць, тое і будуць казаць, тыя дзеянні і будзе выконваць яго цела. Вельмі страшна — згубленыя людзі цалкам. І такіх большасць», — распавядае сам Ілья ў лістах.

Суд над Ільёй адбыўся ў Гомельскім абласным судзе напрыканцы жніўня. Працэс праходзіў у адкрытым рэжыме — на яго змаглі трапіць бацькі і сябры хлопца. Справу разглядаў суддзя Анатоль Сотнікаў. У выніку Верамееву на падставе ч. 1 арт. 14 і ч. 1 арт. 293 КК (замах на арганізацыю масавых беспарадкаў) і ч. 1 арт. 130 КК (распальванне іншай сацыяльнай варожасці) прысудзілі пакаранне ў выглядзе пазбаўлення волі на тэрмін шэсць гадоў і шэсць месяцаў з адбываннем у папраўчай калоніі ва ўмовах узмоцненага рэжыму.

Ілья Верамееў на судзе напрыканцы жніўня 2022 года

«Ён трымаўся добра. На здымку з суда відаць, як ён пасталеў… На спатканні маці потым прызнаваў, што папаўся вельмі недарэчна. У яго быў такі стан тады [пачатак вайны] — істэрыка і бездапаможнасць. Назапасілася гэта ўсё настолькі, што аж да псіхозу нейкага».

Сястры распавялі (сама яна ў Беларусь з Украіны прыехаць не можа), што Ілья ўспрыняў прысуд спакойна — ён ужо чакаў такі тэрмін:

«Ён успрыняў гэта ўсё спакойна. Ён вельмі верыць у беларусаў і Украіну, што ўсё будзе добра».

«Але столькі гадоў за каментары? Сур'ёзна? У мяне гэта не ўкладаецца ў галаве. Я вельмі доўга жыву ва Украіне ўжо, і вось гэтае адчуванне свабоды і выканання законаў у мяне засела вельмі глыбока. І гэтае беззаконне мяне проста вымарожвае», — рэагуе сястра на прысуд.

22 лістапада ў Вярхоўным судзе адбудзецца разгляд апеляцыйнай скаргі — пасля гэтага хлопца этапуюць у калонію.

Што пісаць у лістах і пакласці ў пасылку Ільі?

Сястра палітвязня распавядае, што хлопец з дзяцінства меў шмат інтарэсаў: ён скончыў музычную школу па класе баяна, займаўся спортам — захапляўся батутамі і барацьбой. Незадоўга да затрымання ён атрымаў правы кіроўцы — «яму вельмі падабаецца кіраваць машынай». Паводле Яны, хлопец вельмі любіць гатаваць і маляваць. 

Лісты Іллі са зняволення

«Ён з дзяцінства любіў маляваць — у яго гэта няблага атрымлівалася, ён прамалёўваў усё да самай дробнай дэталі. І цяпер у СІЗА ён малюе шмат. Ілья хацеў стаць дальнабойнікам, як і я. Таксама хацеў стаць паліцыянтам ці бізнэсоўцам.

Ілья вельмі любіць аўтамабілі, маляванне і гатаванне. Яму было б цікава прачытаць рэцэпты страў з таго, што можна прыгатаваць там. Ілья вельмі любіць музыку, але цяпер расійскую не слухае. Пасля затрымання ён прасіў даслаць яму тэксты песень, але іх не прапусцілі. Я прасіла яго праз маму, каб ён намаляваў комікс пра нашу з ім сустрэчу…

Калі ёсць такая магчымасць, то прашу паслаць яму пустых канвертаў і прылады для малявання — алоўкі і паперу. Мяркую, ён быў бы вельмі рады гэтаму!»

Да апеляцыі (22 лістапада) хлопца можна падтрымаць пасылкамі, грашовымі пераводамі і лістамі: СІЗА-3, 246003, г. Гомель, вул. Кніжная, 1А, Ілья Аляксандравіч Верамееў

Каментары1

  • хх
    02.11.2022
    які разумны. разважанні... высновы...
    "Што «праграме» іх не падабаецца, тое «не можа быць». Вось неяк так."
    як шкада, што сістэма прайшлася і па яго псіхіке брутальным катком...

    такое адчуванне, што на нашым грамадстве праводзяць нейкі эксперымент...
    гэтых 5 «зомбі» да яго ж пэўна невыпадкова падсадзілі...

Немец, прысуджаны да расстрэлу, датычны да дыверсій? Вось што за гісторыя гэта магла быць5

Немец, прысуджаны да расстрэлу, датычны да дыверсій? Вось што за гісторыя гэта магла быць

Усе навіны →
Усе навіны

Стары паплечнік Лукашэнкі параўнаў яго з аяталой Хамейні. Параўнанне так сабе2

На Менцы раскапалі ўжо тры рады гакавых драўляных канструкцый ФОТА3

16-гадовая беларуска ўпала з шостага паверха ў Варшаве

Ірына Абельская стала заслужанай доктаркай16

Полк Каліноўскага афіцыйна пацвердзіў замену свайго камандзіра і заявіў пра рэфармаванне17

Польшча распачала паляванне на кампаніі, якія абыходзяць санкцыі супраць Беларусі і Расіі1

Лукашэнка загадаў адпраўляць на ліквідацыю наступстваў урагану палітзняволеных17

«Па выхадных нават чэргі». У Мінску адкрылася «касмічная» зона адпачынку з бясплатным вяровачным гарадком

У Львове стралялі ў палітыка Ірыну Фарыён. Яна ў крытычным стане18

больш чытаных навін
больш лайканых навін

Немец, прысуджаны да расстрэлу, датычны да дыверсій? Вось што за гісторыя гэта магла быць5

Немец, прысуджаны да расстрэлу, датычны да дыверсій? Вось што за гісторыя гэта магла быць

Галоўнае
Усе навіны →