Польскі фермер зноў прыязджаў у Гродна як «кіраўнік дэлегацыі Падляшскага ваяводства». Хоць прадстаўляе толькі сябе самога
Польскія СМІ апублікавалі дэталі новага візіту ў Гродна падляшскага фермера Кшыштафа Талвінскага. З ім сустракалася начальства Гродзенскай вобласці, а мясцовы дзяржаўны тэлеканал назваў «кіраўніком дэлегацыі Падляшскага ваяводства», піша Радыё Свабода.
Талвінскі мае на Падляшшы ўласную ферму, займаецца вытворчасцю малака. У сярэдзіне 2000-х ён быў віцэ-маршалкам Падляшскага ваяводства. Пасля гэтага змяніў некалькі партый і беспаспяхова балатаваўся ў Сейм. Апошнія некалькі гадоў ён быў звязаны з нацыяналістычнай і антыеўрапейскай кааліцыяй Konfederacja. У красавіку Талвінскі абвясціў, што стварае ўласную партыю Front. На старонцы ягонай партыі ў фэйсбуку менш за 150 падпісчыкаў, яна ў працэсе рэгістрацыі.
У Горадні Талвінскага прымаў намеснік старшыні аблвыканкама Віталь Нявера. Яны размаўлялі, між іншым, наконт энергетычнай бяспекі, у тым ліку аб працы атамнай электрастанцыі ў Астраўцы. Гродзенскі дзяржаўны тэлеканал паказаў сюжэт пра візіт Талвінскага, назваўшы яго «кіраўніком дэлегацыі Падляшскага ваяводства». Але хто апрача яго быў у дэлегацыі — не паведамлялася. Паводле аўтараў сюжэту, у Гродне Талвінскі размаўляў з уладамі пра «харчовую бяспеку».
Напярэдадні візіту ў Беларусь Кшыштаф Талвінскі напісаў на адным з сайтаў, што ў яго дэлегацыю ўваходзіць тры асобы, «але мы — голас мільёнаў палякаў». Падчас візіту ў Гродзенскую вобласць Талвінскі заявіў, што Беларусь «з'яўляецца адной з найлепш кіраваных краін», а Лукашэнка — «дзяржаўны дзеяч, сапраўдны палітык».
Талвінскі наведваў Беларусь у жніўні. Тады падчас візіту ў Ваўкавыскі раён ён называў сябе прадстаўніком дэлегацыі «ад імя падляшскага самакіравання». Разам з Талвінскім Беларусь тады наведаў Арвід Плівачэўскі з пракрамлёўскага фармавання «Zadrużny Krąg — Славянскі аддзел» і пракрамлёўскай грамадска-палітычнай арганізацыі Rusov Polska, якая ўваходзіць у міжнародную структуру Rusov, «накіраванай на аб’яднанне славянскіх земляў». Сядзіба гэтай арганізацыі знаходзіцца ў Севастопалі.
Аднак пасля гэтага візіту маршалак Падляшша Артур Касіцкі адмаўляў, што дэлегацыя на чале з Талвінскім прадстаўляла самакіраванне ваяводства. Ён заявіў, што такія сустрэчы з прадстаўнікамі ўладаў Рэспублікі Беларусь «шкодзяць іміджу Падляшскага ваяводства і, шырэй, польскім інтарэсам», праінфармаваўшы пра гэты «шакуючы выпадак» МЗС.
КДБ затрымаў жанчыну, з дома якой было знята відэа падзення шахеда ў Калінкавічах39
Каментары