Украінскі спартсмен абняўся з расійскім на п'едэстале гонару ў Пекіне
Сёння на спаборніцтвах па лыжнай акрабатыцы на Алімпіядзе ў Пекіне, на якіх няўдала выступілі беларускія спартсмены, другое і трэцяе месца занялі адпаведна, украінец Аляксандр Абраменка і расіянін Ілля Бураў. Перад узнагароджаннем яны абняліся і пазіравалі фатографам.
Гэтая сітуацыя была б звычайная, каб не варожыя адносіны паміж дзвюма краінамі. Аналагічны эпізод падчас летняй Алімпіяды ў Токіо, якая адбылася летам 2021 года, выклікаў ва Украіне вялікі скандал.
Тады ўкраінская скакуха ў вышыню Яраслава Магучых пасля заканчэння спаборніцтваў падышла да расіянкі Марыі Ласіцкене, каб павіншаваць яе з перамогай і зрабіць традыцыйны сумесны здымак. Далёка не ўсе суайчыннікі паставіліся да гэтага станоўча. Магучых сутыкнулася са шквалам крытыкі, заўвагі ёй рабілі і ў мясцовым Мінспорту.
Абраменка, аднак, робіць гэта не першы раз. На папярэдняй Алімпіядзе 2018 года ў карэйскім Пхёнчхане Абраменка з Буравым таксама былі на п'едэстале: украінец — першым, расіянін — трэцім. На п'едэстале яны абняліся для фатаграфіі і Абраменка абгарнуў таварыша ўкраінскім сцягам. Тады за гэта таксама давялося апраўдвацца.
Відаць, трэба гэтага чакаць і цяпер. Тым больш што Мінспорту Украіны перад пачаткам спаборніцтваў папярэджвала, што з расіянамі ўкраінскім спартсменам цесных кантактаў падчас Гульняў мець не варта, ды і падчас іх ужо было некалькі скандалаў, звязаных з правакацыйным стаўленнем да ўкраінцаў з боку расійскіх СМІ.
Чытайце таксама:
Расійскія СМІ даймаюць украінцаў на Алімпіядзе пытаннямі пра рускую мову. «Што, нам у адказ пытацца аб допінгу і агрэсіі?»
Украінскі фігурыст на прэс-канферэнцыі адказаў расійскім журналістам па-англійску. Для іх гэта было нечакана
«Азначэнне Беларусі як выпаленай зямлі мне не падабаецца». Маналог беларуса, які нядаўна з’ехаў з краіны13
Каментары