Фільм тыдня: «Паляўнічыя на прывідаў: нашчадкі». Рэальны шанец расслабіцца
Успомніць дзяцінства і рэлакснуць сярод нашай жахлівай рэчаіснасці. Гэта толькі адна з прычын, чаму варта паглядзець гэты фільм.
«Паляўнічыя на прывідаў: нашчадкі» (англ. Ghostbusters: Afterlife) — гэта амерыканскі фантастычны камедыйны фільм 2021 года, зняты рэжысёрам Джэйсанам Райтманам. Гэты фільм — працяг знакамітых «Паляўнічых на прывідаў» 1984 года і «Паляўнічых на прывідаў ІІ» 1989-га, якія зняў бацька Джэйсана Райтмана, Айван Райтман. Першую і другую часткі многія глядзелі ў дзяцінстве і назаўжды запомнілі белых як зефіркі прывідаў, песню Ghostbusters Рэя Паркера і ўсю адважную каманду саміх паляўнічых.
Самым каштоўным у старых фільмах пра паляўнічых лічыцца мілае спалучэнне камедыйнасці і хорару, а таксама незвычайныя досыць дарагія спецэфекты. Гумар і хорар лёгка пераплятаюцца і ў новым фільме, але да таго ж яго ўжо хваляць за атмасферу ўтульнасці, як бы парадаксальна гэта ні гучала пра фільм аб прывідах.
Паколькі арыгінальны фільм быў адным з самых паспяховых у 1984 годзе, у яго засталося шмат фанатаў па ўсім свеце — і сёння гэтым фанатам каля сарака гадоў. Яны і сталі той аўдыторыяй, якая з нецярплівасцю чакала выхаду трэцяй часткі гісторыі пра паляўнічых на прывідаў. Працяг ім давялося чакаць трыццаць з лішнім гадоў — і ён успрымаецца цяпер найперш як рэлаксант, бо прымушае з асалодай узгадаць дзяцінства.
19 лістапада 2021 года фільм быў выпушчаны ў пракат у ЗША і свет ужо абляцелі першыя водгукі. Яго ўжо можна паглядзець у беларускіх кінатэатрах.
Пра што фільм
Самотная маці з дваімі дзецьмі-падлеткамі селіцца на ферме ў Аклахоме. Ферму яна атрымала ў спадчыну ад бацькі, і мусіла прыехаць туды, каб разабраць яго рэчы. Гэта трэба было зрабіць даўно, але яна ўсё адкладала. Дзеці, вядома, не ў захапленні — яны мусяць прызвычаіцца да вясковага жыця пасля горада, ды яшчэ ў занядбаным доме з засмечаным падворкам. Яны спрабуюць больш даведацца пра дзеда і знаходзяць пастку для прывідаў, касцюмы паляўнічых на прывідаў і іх аўтамабіль. Знойдзены рыштунак акурат мусіць ім спатрэбіцца, бо суседні горад пачынае перыядычна трэсці, а неўзабаве на яго вуліцах з’яўляюцца самыя сапраўдныя прывіды.
Хто і каго грае
Дзяўчынку Фібі, дачку галоўнай гераіні, грае таленавітая маладая акцёрка Маккена Грэйс. Фібі — нерэальна разумны падлетак, які на роўных вядзе размовы пра навуку з настаўнікам містэрам Грубэрсанам. Грубэрсана грае Пол Рад, той самы акцёр, які на днях быў прызнаны самым сэксуальным мужчынам планеты.
Харызма Макены Грэйс у ролі Фібі, хочацца верыць, спакусіць многіх падлеткаў з такой жа асалодай занурыцца ў свет навукі.
Ну а Пол Рад — адзінае, за што яго крытыкуюць кіназнаўцы, дык гэта за тое, што яго недастаткова шмат у гэтым фільме. Але кожная сцэна з ім — суцэльная асалода.
І так, натуральна, яго герой, школьны настаўнік Фібі, пачынае сустракацца з мамай Фібі, Келі Спэнглер (яе грае Кэры Кун).
Ацэнкі фільма
Звяртае на сябе ўвагу разбежка ў ацэнцы фільма гледачамі (95% на Rotten Tomatoes) і крытыкамі (69% на Rotten Tomatoes).
IMDB — 7,8/10.
Чаму ў галівудскім кіно ўсё менш сэксу?
Праз 18 гадоў на экраны вяртаецца легендарная «Матрыца». Ужо выйшаў трэйлер
Коля Лукашэнка сыграў на раялі на «Дні народнага адзінства». Яго тата перад гэтым прыгразіў Трэцяй сусветнай вайной34
Каментары