Кіраўнік МЗС Беларусі распавёў, хто, акрамя Расіі, падтрымлівае Мінск.
Акцыі пратэсту ў Беларусі, якія працягваюцца ад жніўня, і рэакцыя на іх уладаў справакавалі ўвядзенне санкцый супраць беларускіх чыноўнікаў і прадпрыемстваў краінамі Еўрапейскага саюза і ЗША. Падтрымку Мінску працягвае аказваць Расія. Пры гэтым казаць аб тым, што ў замежнай палітыцы краіны застаўся толькі расійскі вектар, было б няправільна, заявіў у інтэрв'ю РБК міністр замежных спраў Беларусі Уладзімір Макей.
«Я не пагаджуся, што мы засталіся адны толькі разам з Расіяй і іншыя кантакты ў замежнапалітычнай сферы ў нас спрэс адсутнічаюць. Зусім не. У нас захаваліся нармальныя адносіны з краінамі так званай далёкай дугі, з Кітаем, Пакістанам, іншымі», — сказаў міністр. Па яго словах, адносіны з Еўрапейскім Саюзам не спыняліся. «Ёсць каля дзесяці краін, з якімі ў нас гандаль за мінулы год узрос, нягледзячы на пандэмію, нягледзячы на тыя палітычныя нюансы, якія вы згадалі. Таму казаць пра тое, што мы засталіся толькі толькі з Расіяй і больш нас ніхто не падтрымлівае, я б не стаў», — сказаў ён.
На думку Макея, цяжкасці ў адносінах з ЕС — часовыя: «Рана ці позна прыйдзе ўсведамленне таго, што Беларусь мае важнае значэнне, у тым ліку і для Еўрапейскага Саюза. І захаванне дзяржаўнасці Беларусі, незалежнасці і яе суверэнітэту мае важнае значэнне і для Еўропы».
У Мінска працягваюцца тэлефонныя кантакты з краінамі Еўрапейскага Саюза. «Нават па тэлефоне яны прыслухоўваюцца да некаторых аргументаў, і я бачу, што рана ці позна гэтыя нашы афіцыйныя аргументы дойдуць да іх. І яны не будуць прыслухоўвацца толькі да апанентаў улады, якія заклікаюць толькі да санкцый, да перадачы ўлады і пры гэтым не прапаноўваюць ніякага пазітыўнага парадку дня» — выказаў надзею Макей.
«Усе пазітыўныя моманты для ўсіх — і для еўрапейцаў, і для беларусаў — за апошнія пяць гадоў былі дасягнуты менавіта дзякуючы канструктыўнага дыялогу Еўропы з дзейнай уладай», — нагадаў Макей. «Калі яны хочуць адмаўляць відавочнае і не працаваць з цяперашняй уладай — гэта іх права. <…> Мы гатовыя працаваць з еўрапейцамі, мы гатовыя абмяркоўваць любыя пытанні, мы гатовыя працаваць і з АБСЕ па абмеркаванні сітуацыі ў нашай краіне, па знаходжанні шляхоў выхаду з гэтай сітуацыі. Але гэта не азначае, што мы пагодзімся на тыя рэчы, якія яны прапануюць: трансфер улады, безумоўны сыход цяперашняга прэзідэнта з пасады, змена ўлады праз рэвалюцыю, праз ціск вуліцы і гэтак далей, і таму падобнае. Гэта абсалютна непрымальна, таму што рэвалюцыя ніколі ні да чаго добрага не прыводзіла» — рэзюмаваў ён.
Паводле ацэнкі Еўрасаюза, сітуацыя з правамі чалавека, дэмакратыяй і вяршэнствам права ў Беларусі значна пагоршылася напярэдадні, падчас і пасля прэзідэнцкіх выбараў 9 жніўня 2020 года, якія ЕС абвясціў несвабоднымі і несправядлівымі.
Чытайце таксама: Макей расказаў пра тэмы перамоў Лукашэнкі і Пуціна
Ідэолаг Мінабароны расказаў, што гульню Pokemon Go выкарыстоўвалі для шпіянажу — збіралі даныя пра авіябазу ў Мачулішчах9
Каментары