«Цярпення, вайна толькі пачынаецца». Што пішуць на сайце «Разам з Расіяй», дамен якога належыць расійскаму пасольству?
Беларуская і расійская прапаганда з дня ў дзень ные аб «двайных стандартах» крывадушнага Захаду, аб тым, што заходнія краіны нібыта спарадзілі масавыя пратэсты ў Беларусі. Асабліва дастаецца ЗША, Літве і Польшчы. Апошняя нібыта наогул пагражае захапіць Беларусь ці яе частку, піша ў фэйсбуку палітолаг Андрэй Елісееў.
Уявіце на хвіліну такую сітуацыю.
Пры польскай амбасадзе ў Мінску дзейнічае так званая Асацыяцыя польскіх суайчыннікаў у Беларусі. Яе сайт рэгулярна размяшчае публікацыі пра тое, што беларускага народа нібыта не існуе, і пра тое, што беларусы — гэта нібыта разнавіднасць польскага народа. Кіраўнік гэтай асацыяцыі даказвае, што Беларусі трэба хутчэй адмовіцца ад свайго суверэнітэту на карысць Польшчы.
Уявіце таксама, што гэты сайт дайшоў аж да таго, што пачаў публікаваць віншаванні ад імя ўсякіх актывістаў, якія зычаць Польшчы вярнуцца ў межы 1939 года і завяршаюць свае пажаданні словамі «цярпення, вайна толькі пачынаецца».
Калі б гэта адбылося, то прапагандысты кшталту Азаронка і Салаўёва нарэшце атрымалі б грунтоўную падставу апантана крычаць аб польскім імперыялізме. Беларускі і расейскі МЗС і іншыя міністэрствы выдалі б дзясятак пракламацый аб заходняй пагрозе. А то і арганізавалі б пазачарговыя вайсковыя вучэнні. Правакацыя ж не на жарт!
Дык вось, нічога з гэтага, зразумела, няма. Няма такой асацыяцыі і няма такога сайта пры польскай амбасадзе, няма такіх ваяўнічых публікацый, якія пагражаюць беларускаму суверэнітэту і тэрытарыяльнай цэласнасці.
Затое ўсё гэта ёсць пры расійскім пасольстве.
Ёсць сайт «Разам з Расіяй», дамен якога належыць расійскаму пасольству. Гэты сайт рэпрэзентуе Каардынацыйную раду кіраўнікоў беларускіх грамадскіх аб'яднанняў расійскіх суайчыннікаў (КРАРС).
Кіраўнік КСАРС і рэдактар сайта Андрэй Герашчанка і ягоныя аднадумцы кляпаюць небыліцы пра варожы, а то і «нацысцкі» Захад, «трыадзіны расейскі народ», усякую канспіралогію пра пратэсты, прасоўваюць «паглыбленую інтэграцыю» (ці то з Расеяй, ці то ўжо ў Расею), якая пагражае беларускаму суверэнітэту.
Нарэшце, адно з навагодніх віншаванняў сайта «Разам з Расеяй» ад імя Уладзіміра Рыжанкова, кіраўніка беларускага адгалінавання так званага «нацыянальна-вызвольнага руху», зычыць «перамогі Пуціна і поўнага аднаўлення суверэнітэту Расеі … у межах 1945 года».
І шматзначна дадае ў канцы: «цярпення, вайна толькі пачынаецца».
І што ж беларускі МЗС, усе вялікія і малыя «гаранты і абаронцы» беларускага суверэнітэту і змагары з падвойнымі стандартамі? Можа быць, хоць хто-небудзь з іх сказаў з гэтай нагоды хоць адно слова?
Цішыня…
Пасля прыёму ў міністра Кубракова арыштавалі жанчыну, якая шмат гадоў змагаецца з «педафільскім лобі»6
Каментары