Колькасць ахвяр каранавіруса ў Швецыі перавысіла 5000
102 чалавекі памерлі ад каранавіруса ў Швецыі за апошні дзень. Агульная колькасць ахвяр пандэміі тут перавысіла 5000, паведамляе шведскі статыстычны сайт.
За сітуацыяй у Швецыі сочаць, бо разам з Беларуссю гэта адзіная ў Еўропе краіна, якая не ўводзіла строгі каранцін. Швецыя таксама вядомая высокай ступенню празрыстасці, яе статыстыка вартая даверу.
Шведская стратэгія абярнулася высокай смяротнасцю. Колькасць ахвяр у пераліку на 100 тысяч чалавек у Швецыі ўжо ў 5 разоў большая, чым у суседняй Даніі, у 10 разоў — чым у Нарвегіі і ў 9 — чым у Фінляндыі. Усе гэтыя краіны супастаўныя па клімаце, багацці і развітасці сістэмы аховы здароўя. Каранавірус пранік у гэтыя краіны адначасова.
Шведскія эпідэміёлагі, якія прапанавалі гэты падыход да пандэміі, трымаюцца думкі, што іншыя краіны пройдуць праз больш масавыя заражэнні пазней.
Варта адзначыць, што эканоміка Швецыі ўпала прыкладна ў той жа меры, што і гаспадаркі краін, якія абвясцілі каранцін. Аднак пазіцыя ўрада краіны падабаецца многім шведам, адпавядае іх суроваму нацыянальнаму характару. Рэйтынг кіраўнічай сацыял-дэмакратычнай партыі ў час пандэміі вырас.
Колькасць выяўленых выпадкаў каранавіруса ў Беларусі і Швецыі прыкладна аднолькавая. Пры гэтым, па афіцыйнай статыстыцы, у Беларусі праведзена ў 2,2 разу больш тэстаў. Памерла ад каранавіруса ў Беларусі, па афіцыйнай інфармацыі, у 16 разоў менш людзей, чым у Швецыі.
Вы не паверыце, кім аказаўся «выпадковы» баяніст на вакзале, які спяваў пра Лукашэнку19
Каментары