Дачка бізнэсоўца-ўцекача Авяр’янава за 700 тысяч нясплачаных падаткаў правядзе ў калоніі 2 гады
Фрунзэнскі раённы суд 12 чэрвеня асудзіў на два гады гады зьняволеньня за нясплату падаткаў у асабліва вялікім памеры прадпрымальніцу Вікторыю Авяр'янаву, дачку вядомага бізнэсмэна Юрыя Авярʼянава. Ёй прысудзілі 3 гады калёніі, але год зьнялі па амністыі. Страты прызналі на 700 тысяч, перадае Радыё Свабода.
Авяр’янаў у 2017 годзе зьехаў у Нямеччыну і не вяртаецца ў Беларусь, дзе супраць яго таксама завялі справу за нясплату падаткаў. Вікторыя Авярʼянава з 2018 году жыла ў Расеі, але надалей кіравала беларускімі фірмамі «Бістроф» і «Інтэкс» і праз апошнюю — менскімі начнымі клюбамі «Мэдысан», «Афрыкана» і «Табу».
Прадпрымальніцу абвінавацілі ў нясплаце падаткаў у асабліва вялікім памеры. Паводле сьледзтва, за пэрыяд з 2010 па 2015 год фірма «Інтэкс» пад кіраўніцтвам Авярʼянавай ня выплаціла ў бюджэт звыш 892 тысяч рублёў. Нібыта ўтойвалася выручка за аказаныя паслугі, што дазваляла значна паменшыць падаткі.
Бацька асуджанай, вядомы ў Беларусі прадпрымальнік Юры Авярʼянаў, валодаў паркам забаваў «Дрымлэнд», кантраляваў «Гандлёвы сьвет — «Кольца»», аўтарынак у Малінаўцы, будаўнічы рынак ва Ўруччы ды іншыя актывы. Генэральная пракуратура Беларусі абвінавачвае Юрыя Авярʼянава ў нясплаце падаткаў у асабліва вялікім памеры, а таксама ў злоўжываньні службовым становішчам, і дамагаецца ад Нямеччыны ягонай выдачы ў Беларусь.
Да затрыманьня Вікторыя Авярʼянава жыла ў Маскве з двума непаўналетнімі дзецьмі. У 2019 годзе на запыт беларускіх праваахоўнікаў яе двойчы затрымлівалі, але вызвалялі рашэньнем суду. Пасьля трэцяга затрыманьня ў канцы 2019 году Авярʼянаву экстрадавалі ў Беларусь.
Суд над Вікторыяй Авярʼянавай цягнуўся амаль месяц. У справе было 10 тамоў, у ёй праходзілі каля 40 сьведак, некаторыя зь іх у суд не з’явіліся, суд заслухаў іхныя паказаньні, дадзеныя на сьледзтве.
«Мы для іх — мяса». Палітвязень выйшаў з меланомай, ён ускладае віну на начальніцу санчасці і прымусовае галенне галавы7
Каментары