Працягваецца вусная перапалка між імавернай кандыдаткай на ўдзел у праймерыз, былой дэпутаткай Палаты прадстаўнікоў Ганнай Канапацкай з цяперашнім і былым кіраўнікамі АГП Мікалаем Казловым і Анатолем Лябедзькам. «Вас што, Казлоў, пакусала Ярмошына?» — задавалася пытаннем Канапацкая, калі яе подпісы, неабходныя для вылучэння на праймерыз, пайшлі на праверку.
У адказ Анатоль Лябедзька выпусціў відэа на партыйным ютуб-канале, у якім сказаў, што, «каб патрапіць у эскорт Лукашэнкі, зусім неабавязкова быць даўганогай брунэткай з параметрамі 90-60-90, дастаткова быць у палітычным эскорце».
«Ганна, я зусім не разумею, навошта ў сваім тэксце пра Мікалая Казлова вы некалькі разоў згадваеце нібыта ягоных «куратараў». Дарма вы гэтую тэму падымаеце. Я разумею, што некаторым вашым прыхільнікам дастаткова дэкальтэ і чырвоназнамённай памады, але ж большасць жыхароў Беларусі дакладна разумеюць, што ўсе дэпутаты ў Беларусі прызначаюцца.
Вас не абіралі выбарцы, вас абіралі сілавыя органы, і асабіста зацвярджаў Аляксандр Лукашэнка. Туды не маглі прызначыць ні Статкевіча, ні Казлова, ні Севярынца, бо ім нельга сказаць пра што можна гаварыць, а на што заплюшчваць вочы», — сказаў Лябедзька.
Гэтае відэа былога кіраўніка АГП набрала больш за 100 тысяч праглядаў.
У сваю чаргу Ганна Канапацкая ў сваіх сацыяльных сетках ахрысціла Мікалая Казлова і Анатоля Лябедзьку «парачкай прафесійных палітычных жабракоў».
«Пакуль Талян беспаспяхова абрывае ўсе магчымыя сродкі сувязі майго бацькі, дамагаючыся сустрэчы на прадмет выклянчвання чарговай порцыі грошай (гэта ж якую нізасць і нахабства трэба мець!), Калян не пакідае патугаў не дапусціць мяне да рэгістрацыі і канчаткова дыскрэдытаваць саму працэдуру праймерыз», — напісала Канапацкая.
Ганна Канапацкая была сябрам АГП, але 1 снежня Палітрада арганізацыі выключыла яе ў сувязі са стратай даверу партыі.
Латушка — Лукашэнку: Я гатовы ўдзельнічаць у выбарах-2025 годзе, але ты — баязлівец і шулер5
Каментары