Беларусь і Еўрасаюз за апошнія два гады дасягнулі вельмі многага ў развіцці сваіх адносін. Пра гэта міністр замежных спраў Беларусі Уладзімір Макей заявіў у інтэрв'ю тэлеканалу Euronews.
«Што тычыцца санкцый… Думаю, што мы рухаемся наперад, павольна, але нязменна. Бóльшая частка абмежавальных мер была адменена ў 2016 годзе. У двухбаковым парадку засталіся толькі некаторыя санкцыі. У першую чаргу, гэта эмбарга на гандаль зброяй. Гаворка ідзе пра гандаль спецыфічнай ваеннай тэхнікай, але не пра экспарт у цэлым, і гэта важна.
Справа ў тым, што мы б хацелі падтрымліваць нармальныя адносіны з Еўрапейскім саюзам, у першую чаргу гандлёва-эканамічныя.
Мы зацікаўлены ў эканамічным супрацоўніцтве з Еўрапейскім саюзам. Чаму? Таму, што гэта дазваляе нам ўмацоўваць нашу эканоміку, захоўваць і ўмацоўваць палітычную незалежнасць. Менавіта таму мы вельмі зацікаўлены ў нармальным гандлёвым і эканамічным узаемадзеянні з Еўрапейскім саюзам. Думаю, што мы павольна рухаемся ў бок поўнай адмены санкцый, і спадзяюся, што гэта здарыцца ў найбліжэйшай будучыні»,
— заявіў міністр.
«Многае ўжо дасягнута, але яшчэ шмат чаго трэба зрабіць. Мы разумеем гэта. Калі існуюць нейкія адчувальныя тэмы — смяротнае пакаранне ці іншыя пытанні, — я думаю, што нашы партнёры павінны ўлічваць канкрэтныя абставіны, умовы, сітуацыю тут, у нашай краіне.
Паўтаруся, немагчыма дасягнуць ўсяго і адразу. Немагчыма легчы спаць у Савецкім Саюзе, а прачнуцца ў цалкам еўрапейскай дэмакратычнай дзяржаве. Гэта не значыць, што мы не хочам вучыцца. Мы гатовыя вучыцца, у тым ліку вывучаць еўрапейскія «падручнікі».
Але доўгі час мы жылі ў Савецкім Саюзе, у савецкую эпоху. Шмат у каго ў нашай краіне ўсё яшчэ захоўваецца савецкая ментальнасць. Таму што ў Савецкім Саюзе нас вучылі, што не індывідуальныя правы граюць галоўную ролю ў грамадстве, а калектыўныя правы, сацыяльныя правы павінны быць для нас на першым месцы. Права на адукацыю, на працу, на жыллё і гэтак далей. Да таго ж нашы людзі прывыклі жыць ва ўмовах, калі дзяржава клапоціцца пра іх. Яны заўсёды ведалі, што могуць разлічваць на дзяржаву. Гэтая ментальнасць ўсё яшчэ ўплывае на сітуацыю ў нашай краіне.
Акрамя таго, мы бачым негатыўныя прыклады ў некаторых суседніх краінах. Менавіта таму Беларусь хоча рухацца наперад асцярожна, не парушаючы стабільнасць у грамадстве», — сказаў Макей.
У Мінску затрымалі партнёраў Мазепіна па «Уралкаліі», адных з самых багатых беларусаў Расіі9
Каментары