Гурт Марыі Гаўрыленка і Алiны Казачэнка ў якасьці прыза атрымлівае 1000 рублёў і здымкі кліпа на песьню, зь якой перамог у конкурсе, зладжаным парталам TuzinFM разам з фондам «Вяртаньне».
Пераможца сёлетняга конкурсу быў абвешчаны на канцэрце фіналістаў, які прайшоў 21 кастрычніка ў менскім клюбе «ILI». Найлепшы быў вызначаны паводле галасаваньня журы, у якое сёлета ўвайшлі Сяргей Доўгушаў (Vuraj), саўнд-прадусар Андрэй Акатаў, электронны музыка Зьміцер Літвіновіч (CherryVata), Алег Хаменка («Палац»), а таксама заснавальнікі конкурсу Павал Бераговіч і Сяргей Будкін.
Усе чатары фіналісты конкурсу паўдзельнічалі ў адукацыйнай сэсіі конкурсу, у межах якой прайшлі лекцыі, майстар-класы, праца ў студыі і жывыя канцэрты. Разам з мэнтарамі яны давялі да ладу песьні, якія падалі на конкурс, ды запісалі іх наноў. Вынік іх працы на «Засьпявай 4x4» якраз і ацаніла журы. «Выбар быў няпросты, бо ўсе чатыры фіналісты вельмі моцныя. Кожны зь іх можа лічыць сябе адным зь лепшых на гэтым конкурсе, бо дайшоў да канца. І мы спадзяемся, што веды, атрыманыя падчас удзелу ў нашым конкурсе, дапамогуць усім чатыром выканаўцам пераадолець неверагодна складаны бар’ер і перайсьці з катэгорыі «маладых і таленавітых» у катэгорыю артыстаў, якія адбыліся. Ад імя ўсяго журы конкурсу жадаю фіналістам, гуртам «Малала», K3tyvana, «Тутэйшыя» натхненьня і посьпеху ў далейшым», — зазначае прадусар конкурсу Сяргей Будкін.
Песьню, якая завецца «Па неадступнасьці» Helious запісалі на верш беларускай паэткі Ніны Лістоты.
«Мы бязьмежна радыя, што перамаглі! Падчас конкурсу мы працавалі, з намі працавалі, над намі працавалі, у выніку мы перагледзелі свае погляды на гучаньне, на падачу, у нас зьявілася сонечная назва гурту, а канцэпцыя конкурснай песьні проста перавярнулася з галавы да ног!», — кажуць дзяўчаты з Helious. У бліжэйшых плянах Марыі Гаўрыленкі і Аліны Казачэнкі запісаць дэбютны альбом. Ад арганізатараў «Засьпявай 4x4» яны атрымаюць творчую стыпэндыю памерам у 1000 рублёў, таксама рэжысэр Арцём Лобач сёлета здыме ім кліп на конкурсную песьню.
Конкурс «Засьпявай» чацьвёрты год праводзяць інтэрнэт-партал TuzinFM разам з фондам «Вяртаньне». Ягоная мэта заахвоціць маладых выканаўцаў зьвяртацца да беларускай мовы і паэзіі ў сваёй творчасьці. У ранейшыя гады пераможцамі станавіліся Віталь Варанко (2014), Naviband (2015), Pauline, Leibonik і трыё Дзьмітры Нікановіч-Вольга Сацюк-Мікіта Найдзёнаў (2016).
Беларуская блогерка працавала на расійскай апазіцыйнай фабрыцы ботаў, а пасля зліла дакументы?43
Каментары