НАТА можа не паспець дапамагчы краінам Балтыі, паказвае новы аналіз
Цэнтр новай амерыканскай бяспекі (CNAS) правёў штабную гульню з удзелам амаль 50 дзейных і былых высокапастаўленых вайскоўцаў НАТА, ЕС і краін Балтыі ў лютым.
З наяўным узроўнем арганізацыі агульнай абароны НАТО можа спазніцца з дапамогай арміям Літвы, Латвіі і Эстоніі ў выпадку расійскай агрэсіі, сведчыць аналіз Цэнтра.
У выпадку аперацыі, падобнай да крымскай, і масіраванай атакі расійскіх рэгулярных войскаў, якія будуць падтрыманыя прапагандысцкай кампаніяй, кібер-аперацыямі і спецназам, войскі НАТА проста не паспеюць хутка адрэагаваць, лічаць аналітыкі.
Асноўныя амерыканскія сілы трэба будзе перакідваць з ЗША, а сіл, якія знаходзяцца ў Еўропе (Італіі, Польшчы, Германіі, краінах Балтыі), можа быць недастаткова.
«Цяпер мы маем толькі адну роту — менш за 200 жаўнераў — у кожнай з трох балтыйскіх краін», — лічыць суаўтар дакладу, былы супрацоўнік Пентагона Джуліяна Сміт, перадае партал breakingdefense.com.
Больш за тое, застаецца неабароненай Швецыя, якая не ўваходзіць у НАТА, а захоп выспы Готланд і хуткае стварэнне там ваеннай базы фактычна можа закрыць балтыйскі рэгіён для авіацыі і флота хаўруснікаў.
Неабходна падвысіць узровень супрацоўніцтва паміж еўрапейскімі сіламі краін НАТА і зрабіць больш простай сістэму камандавання імі, лічаць аналітыкі.
«Але два дні, падчас якіх праводзілася штабная гульня, далі таксама і пазітыўны вынік. Узровень сур'ёзнасці, з якой дзейныя і былыя вайскоўцы удзельнічалі ў вучэнні, а таксама смелых ідэй, якія былі прапанаваныя, быў надзвычайным», — гаворыцца ў аналітычным дакладзе.
Як склалася жыццё вундэркінда з Жодзіна, які ў 12 гадоў паступіў у медыцынскі ўніверсітэт?5
Каментары